Istorgia

Dal 1986 ha la famiglia chi posseda l’hotel Scuol-Palace l’intenziun da transfuormar la chasa dals bogns in üna chasa d’artists, per survgnir üna staila implü per lur hotel.

L’artist d’Engiadina Bassa Steivan Liun Könz as drizza cun quist’idea a Henry F. Levy, il fundatur da la Fundaziun BINZ39 a Turich, e til persvada da gnir in Engiadina a tour suot ögl quist lö. Henry F. Levy es subit persvas da l’intent da la famiglia Senn e s’inamurescha ill’architectura da la chasa dals bogns sper l’En. In seguit decida Levy davo cuortas trattativas da metter ad ir l’edifizi stat neglet. Per la paja survain el ün dret da precumpra sül fabricat, üna suita aint il hotel, e’ls artists pon mangiar gratuitamaing aint il hotel. Peter Senn fa fallimaint 18 mais plü tard, e Levy s’acquista la chasa.

Ils desch ons chi seguan maina la Fundaziun BINZ39 la chasa d’artists cun 10 ateliers e listess bleras plazzas da durmir, ingaschond dad on ad on ün curatur. La chasa per artists ha da prüm’innan eir la funcziun da center cultural. Dal 1998 as schlargia la basa da portaders. Il Chantun Grischun e la regiun d’Engiadina Bassa (PEB) as partecipeschan uossa insembel cun la Fundaziun BINZ39 a la gestiun. Quista fasa intermediara va a fin l’on 2005, cur chi vain fundada la Fundaziun NAIRS. Henry F. Levy fa sü la chasa a la fundaziun nouva cun l’unic servitut cha quella vegna dovrada inavant per scopos artistics.

Ils ons seguaints schlargia la Fundaziun NAIRS seis chomp da lavur cuntinuantamaing, e dal 2011 vain il nom dal center da cultura müdà in ‚NAIRS Center d'art contemporana’.