Fundaziun

NAIRS nun es ingün lö immaterial ingio cha tuot es intact, NAIRS es blerant ün lavuratori – ün lö da creaziun reala, ün lö ingio chi pon gnir reflettadas las consequenzas da la lavur e l’interacziun cul public.(...) Eu ingrazch als respunsabels da NAIRS ed a las persunas activas sül chomp cultural per lur lavur preziusa, per lur actività in quist lö, e m’allegr da verer a flurir l’avegnir da quist lö misterius, s-chür. Possa NAIRS trar a nüz la potenzialità dal nair in sia totalità. In tuottas fuormas e culuors.

Martin Jäger

Regierungsrat Kanton Graubünden, 2011

La Fundaziun NAIRS, fundada dal 2005, es üna sintesa unica da halla d’art, center cultural e chasa per artists. Ella collia l’Engiadina cun l’art contemporana svizra ed internaziunala.

In sia funcziun da halla d’art realisescha la Fundaziun NAIRS exposiziuns d’art contemporana svizra ed internaziunala, üna blerüra da differents arrandschamaints culturals e colloquis.

Sco center cultural da l’Engiadina s’occupa la Fundaziun NAIRS da la cultura, da l’actività culturala e dals problems da la regiun. Ella tematisescha l’incletta culturala da sai stess da l’Engiadina odierna ed organisescha occurrenzas davart la vita culturala da la Rumantschia.

Daspö il 1999 maina Christof Rösch las activitats da la fundaziun NAIRS sco directur e manader da la lavur artistica. Suot sia direcziun s’ha la chasa drivida e sviluppada a quai ch’ella es hoz. El s’ingascha pel mantegnimaint dal stabilimaint istoric our dal temp da fluraschun dal turissem da cura e d’aua minerala dal 19avel tschientiner, ed a listess temp per pudair preschantar ed intermediar art contemporana.

Ultra da quai güda la lavur da Christof Rösch a rinforzar il consciaint cultural da la regiun. Dasper l’art contemporana vegnan miss in discussiun regularmaing temas ed aspets da l’istorgia culturala dal passà. Quai cun la pretaisa da gnir a cugnuoscher e render preschaint qualitats existentas ed uschè da tillas mantgnair vivaintas per l’avegnir. E quist tuottafat i’l sen d’üna radicalità chi chava oura ragischs i’l vaira sen dal pled e collia passà cun futur.

NAIRS as dà il böt d’esser üna da las instituziuns chi dà taimpra a la fuormaziun da l’opiniun politic-culturala i’l Chantun Grischun, chi’d es exemplarica ill’intermediaziun comunicativa da lavur artistica e culturala d’hozindi e chi’d es unica in sia radiaziun atmosferica. Schi reuschischa da far our da NAIRS üna vusch critica sco eir ün’intermediatura tanter ils muonds, lura füss la quadratura dal circul pelvaira gratiada. Utopic? Forsa. Ma NAIRS es ün cas special – e perquai in cas da far qualchosa da special.