Hans-Jörg Heusser

President dal cussagl da fundaziun

Dr. Hans-Jörg Heusser es istoriker d’art, publicist e cusgliader d’intrapraisa. El maina hoz a Turich ün’agna firma per cusglianza strategica i’l sectur cultural. Fin in avuost 2010 es el stat dürant raduond duos decennis directur da l’Institut Svizzer per scienza d’art (SIK-ISEA) a Turich e Losanna. Suot sia direcziun s’ha sviluppà il SIK-ISEA in möd fich dinamic ed es dvantà ün center da l’istorgia d’art svizra ed ün ‚Institute for Advanced Study’ cun reputaziun internaziunala.

Heusser ha stübgià il prüm giurisprudenza e scienza d’economia da manaschi, lura istorgia d’art, istorgia d’art da l’Asia orientala ed istorgia da las religiuns. El ha conclus seis stüdis dal 1978 a l’università da Turich cun ün doctorat in istorgia d’art. Al principi da si’actività professiunala ha el lavurà sco schurnalist per differentas gasettas e sco redactur ed autur da films per la televisiun svizra DRS. Nouv ons es el stat president da l’Association Internationale de Critiques d’Art (AICA) e ses ons eir vicepresident internaziunal. Dal 1995 – 2002 ha el presidià la cumischiun d’art da la cità da Turich. Dal 1998 – 2004 es el stat president da fundaziun da la Association of Research Institutes in the History of Art (RIHA), a la quala appartegnan hoz 28 instituts importants da perscrutaziun da l’Europa e da sur mar.

Heusser es autur da numerusas publicaziuns in cudeschs, catalogs ed artichels davart l’art e la scena d’art da l’epoca moderna e contemporana. Dal 1983 – 1993 es el stat, in incumbensa da l’“Association Internationale des Critiques d’Art“, editur e schefredactur dal periodic inglais „AICARC – Bulletin of the Archives and Documentation Centers for Modern and Contemporary ARt“. El ha organisà numerus colloquis svizzers ed internaziunals ed es stat fich activ sco docent e referent in Svizra ed a l’ester. Daspö il 2010 es el commember dal Executive Committee dal cuors superiur „Art Market Studies“, fundà nouv a l’università da Turich.

Heusser ha lavurà e lavura per differentas fundaziuns culturalas sco commember dal cussagl da fundaziun e sco cusgliader d’art. Fingià sco directur da l’institut SIK-ISEA ha el cusglià daspö blers ons uffizis e grondas interpraisas in dumondas da l’art e da seis manaschamaint; quist’actività da cusgliader cuntinua el hoz cun sia agna firma da consultaziun.

zurück

Translation available / Traducziun disponibel : German, English