Christof Rösch

Direcziun e manader d’art


Christof Rösch, nat dal 1958 a Turich, ha absolt dal 1981-1985 la scoula superiura d’art applichada a Basilea, ingio ch’el ha eir instrui ils ons 1987-1995 per differentas incumbenzas. Stipendis til han manà a Paris a la ‚Cité Internationale des arts’ (1987), a NAIRS (1991) ed al ‚Istituto Svizzero’ a Roma (1997-1999). Dürant seis sogiuorn da stà a NAIRS s’ha sviiluppada pro el l’amur per la cuntrada culturala da l’Engiadina, ch’el ha bainbod tschernü sco seguonda patria. Daspö il 1991 lavura Christof Rösch a NAIRS sco manader d’art e curatur, maina a Sent ün atelier d’art e d’architectura, e maina insembel cul architect Rolf Furrer da Basilea l’atelier ‚Schigliana Architekten Schweiz’. Exposiziuns singulas han gnü lö tanter oter aint il KiFF ad Aarau (1995) ed i’l Kunstraum Riehen (2000). Daspö il 1986 as partecipescha Christof Rösch regularmaing ad exposiziuns da gruppa in Svizra ed a l’ester. Pro sias ouvras exemplaricas i’l spazi public appartegnan la ‚Moliniser Sammlung’, Molinis/GR (1995), la fuormaziun ‚Resonanzen’ da la plazza da scoula Kaltbrunnen a Basilea (1996) e ‚Versuch zur Gegenwart’ a la scoula districtuala Baden/AG (1996). L’ultim ha el s-chaffi ‚NAIRSmobil’ (2010/11), ün’intervenziun sculpturala temporaria cun lös variabels in Engiadina. Per sias activitats artisticas ed architectonicas ha Christof Rösch survgni tanter oter l’on 2001 il premi da la Fundaziun Alexander Clavel, Basilea, e la ‚Undrentscha per buns fabricats Grischun’ per la restoraziun e transfuormaziun da la chasa Schigliana 183 a Sent (insembel cun Rolf Furrer). Dals differents progets architectonics esa da manzunar impustüt la renovaziun da l’hotel da cultura ‚Piz Tschütta’ a Vnà, chi’d es gnü drivi l’on 2008. Sco manader d’art e curatur a NAIRS realisescha Christof Rösch numerusas exposiziuns in chasa, elavura il program d’arrandschamaints culturals ed iniziescha process interdisciplinars sco eir discussiuns davart temas in connex cun la vallada e sia cuntrada. S’occupond in möd vast cun art ed istorgia culturala intuorn NAIRS e l’Engiadina survain el ils impuls essenzials per sia lavur.

Contact: ch.roesch@nairs.ch

returnar

Translation available / Traducziun disponibel : German, English