Renovaziun e concept da gestiun

Tras las cundiziuns da basa dal fabricat d’eiran las pussibiltats per ün svilup da la gestiun, uschè sco cha’l scopo da la fundaziun postulescha, limitadas fundamentalmaing.

Sco cha’l preproget dals architects Padrun e Rösch muossa, survain la fundaziun tras la renovaziun la capacità da’s svilupar inavant e da realisar ün concept da gestiun orientà vers l’avegnir. Las müdadas essenzialas da la basa da menaschi sun:

Müdada ad üna gestiun da tuot on

Siond cha la chasa nun ha in seis stadi d’hoz ingün s-chodamaint, stuvaiva la fundaziun restrendscher fin uossa la gestiun sün maximalmaing 5 mais e mez d’instà. Cun installar ün s-chodamaint esa pussibel da müdar via sün üna gestiun da tuot on. Il nouv concept da gestiun prevezza da nüzziar la chasa – almain parzialmaing – dürant tuot on e da schlargiar il menaschi regular da la fundaziun sün 9-10 mais l’on.

L’installaziun d’ün s-chodamaint pretenda meglioramaints termics da tuot ils mürs exteriurs. Ün’isolaziun externa es però exclusa per motivs da chüra da monumaints e nu vain prquai in dumonda. Planisada es ün’isolaziun parziala interna: ils fuonds da schlers e palantschin vegnan isolats tras oura; listesssamaing parts da la fatschada nord. Il tet existent da tola resta ün tet fraid.

La masüra principala per üna meglioraziun termica es üna seguonda vetta da fanestras dadaintvart. Davo tuot las fanestras istoricas cun üna lastra, chi vegnan be missas ad ir e renovadas, vain montada üna vetta nouva da vaider isolà.

Il s-chodamaint vain traparti in differentas gruppas, uschè chi pon gnir s-chodadas eir be parts da la chasa. Uschè pon avair lö d’inviern arrandschamaints eir sainza stuvair s-chodar tuot la chasa.

S-chaffir il spazi bsögnaivel per la gestiun da halla d’art

Tras la müdada d’ütilisaziun dal plan suotterran (da plü bod ufficina da serrürier, lavandaria e stiraria) vain liber spazi implü pel manaschi da la halla d’art. Insembel cul plan suot il tet, chi po gnir dovrà eir in avegnir be da stà, s’haja localitats d’exposiziun da ca. 360 mq sün quatter plans.

Impustüt il local d’immez dal plan terrain survain bler dapü valur, dal püt da vista concepziunal ed architectonic. Üna vouta cha quel es accessibel tras üna s-chala nouva plü largia, dvaina quel il punct central per tuot las occurrenzas publicas in chasa. Il local survain ün adöver multifuncziunal e po gnir dovrà na be per expuoner, ma eir per mangiars, arrandschamaints plü pitschens, sco bistro (cun terrassa vers l’En), o eir sco bar e stanza da musica.

Drizzar ün local d’arrandschamaints multifuncziunal per la gestiun da center cultural

Aint ill’anteriura stiraria vain s-chaffi da nouv ün local d’arrandschamaints multifuncziunal cun palc variabel per maximalmaing 150 persunas. Tras quai vain redubli il nomer actual da plazzas per occurrenzas, e quai cun megldra qualità dal local.

Plünavant vain amegldrada la qualità d’adöver sco center da cultura tras üna nouva structura dal spazi da la gallaria da pilasters nord sün tuot la lunghezza, chi po accumplir tuot las funcziuns da servezzans per la part publica da la chasa. Quai sun ün local da deposit, üna gardaroba d’artists, üna cuschina, tualettas, ün local per la tecnica (s-chodamaint, sanitari, electric) ed ün deposit pel s-chodamaint da pellets.

Separaziun clera da chasa d’artists e halla d’art

Las duos funcziuns da chasa d’artists e da halla d’art, chi d’eiran fin uossa intretschadas, vegnan separadas constructivmaing dal tuot üna da l’otra. Uschè sta eir in avegnir la part d’immez da l’edifizi sün tuot il plans a disposiziun per exposiziuns. Las duos alas lateralas sül plan terrain e’l prüm plan vegnan separadas da la part d’immez tras portas e sun reservadas dal tuot pels stipendiats e las stipendiatas. Là as rechatta lur spazi d’abitar e da lavur.

Tras las müdadas constructivas dvainta la chasa in avegnir plü flexibla per l’adöver. Exposiziuns ed arrandschamaints publics pon uossa gnir manats tras tuot on sainza tangar la gestiun da la chasa d’artists.

Megldrar l’infrastructura da la chasa d’artists

Las quatter duschas vegnan renovadas tillas laschond però al listess lö. La cuschina vain ingrondida e renovada cumplettamaing. Tuot las chombras e’ls locals da sogiuorn vegnan sanats e drizzats aint nouv. Per rivar dadourvart suot las arcadas al nord-vest, ingio chi’s po mangiar d’instà, vain fat ün access direct nan da la chadafö. I’l plan suotterran ost daja ün nouv atelier da stà chi po gnir dovrà eir sco ulteriur local per expuoner. Quel survain ün’entrada directa dal liber.

Nouv access dal spazi exteriur

Tras nouvs access i’l spazi exteriur dvainta pussibel da girar intuorn ed intuorn il stabilimaint. Tras quai dvainta la terrassa nouva cun vista vers l’En accessibla da dadourvart pel manaschi d’ün bistro.

Translation available / Traducziun disponibel : German, English