Ün cumplex istoric

Il lö pro las funtanas mineralas da l’En es stat daspö adüna collià strettamaing cul svilup dal turissem, da l’architectura e da la vita sociala d’Engiadina Bassa. Ils edifizis dal cumplex da Nairs, fabrichats partind dal 1864, sun aint il register dals 100 stabilimaints degns da protecziun dal Chantun Grischun. I’ns sta a cour da mantgnair e vivifichar eir in avegnir quist’unità istorica e culturala our dal prüm temp dal turissem d’Engiadina Bassa.

La Fundaziun NAIRS ha seis sez ill’anteriura chasa dals bogns da l’implant istoric Scuol Palace a Nairs sün territori dal cumün da Scuol. Il vast cumplex our dal temp tampriv dal turissem engiadinais nun es plü in funcziun daspö 1976. El sta suot protecziun ed es hoz taxà sco monumaint naziunal.

Il cumplex consista essenzialmaing da trais stabilimaints: l’hotel in fuorma da grond palazi, ils bogns spazius e la büvetta imposanta. L’hotel e la büvetta nu vegnan hoz dovrats e sun imnatschats da decadenza e vandalissem. Tuot il cumplex, cumprais üna villa, ün grond üert sco eir plazzas da tennis ed üna punt istorica, es situà directamaing a la riva da l’En.