Istorgia dal stabilimaint

La gestiun dals bogns confortabels ha cumanzà dal 1913 manifestond la prosperità dal lö da cura e da bogns Scuol-Tarasp-Vulpera. La chasa dals bogns rapreschainta amo hoz il temp da flurischun dal turissem al principi dal 20avel tschientiner. Ella tocca pro’ls fabricats principals da l’architectura neoclassicista cun elemaints dal stil floreal (Jugendstil) in Grischun. Pel 100avel anniversari dal Center d’art contemporana dess perquai gnir a fin dal 2013 la sanaziun urgiainta e la renovaziun.

Ün stabilimaint rapreschantativ: Ils architects Koch e Seiler (San Murezzan) han construi il fabricat nouv sün la basa d’üna centrala da maschinas (per la producziun d’aua choda e vapur) our dal 19avel secul. L’edifizi rectangular es situà a la riva da l’En in prosma vicinanza da l’anteriura punt da lain cuernada. La front principala ha duos plans ed es drizzada vers nord. Üna gallaria da culuonnas davant il plan terrain e la culmaina triangulara stipa sur la part d’immez sun l’accent principal dal fabricat rapreschantativ. La fatschada süd da trais plans cun la part d’immez accentuada tras quatter pilasters cannellats dà, insembel cun la culmaina triangulara, la taimpra a la front vers l’En da la chasa.

La vita interna: La disposiziun oriunda da l’intern s’ha mantgnüda substanzialmaing fin hoz. Perquai as poja surtour in seguit la descripziun da Dorta da l’on 1913:
„Il plazzamaint intern dals locals es gnü scholt in möd dret favuraivel seguaintamaing: I’l plan suotterran es gnüda plazzada illa part d’immez la lavandaria, a dretta la lingeria ed a schnestra il schler da chalderas e l’ufficina da serrürier. Sün tuots duos plans sura chattaina ün vestibül central, spazius ed abitabel (10 sün 10 m). I’l plan terrain as rechattan ils solits bogns: a dretta il cumpartimaint per homens, a schnestra quel per duonnas. Ils corridors dals duos cumpartimaints sboccan i’ls locals da posar chi sun fabrichats oura vers il parc sumgliaintamaing a balcuns torts. Üna s-chala largia da marmel collia il vestibül dal plan terrain cun quel dal prüm plan. Ils mürs da las s-chalas furnits cun soccal e plattinas s-chüras da marmel e raboccats cun molta grischainta dan a tuot insembel ün aspet nöbel e pür. A dretta dal vestibül sül prüm plan chattaina l’implant d’idroterapia cun bogns chods e bugliaints ed applicaziuns electricas.“ (citat our da Hotelinventar Scuol-Tarasp-Vulpera d’Isabelle Rucki, Chüra da monumaints dal Grischun, Cuoira, tiposcript 1981)

 

Per ulteriuras infuormaziuns vair broschüra fundaziun NAIRS: PDF

Gebäudedoku NAIRS Titelseite 09

Translation available / Traducziun disponibel : German, English