Bsögn da sanaziun

Concept da gestiun sco premissa

La chasa dals bogns, ingio cha la Fundaziun NAIRS ha seis sez, es ün edifizi neoclassicistic rapreschantativ dals architects Koch & Seiler da San Murezzan fabrichà l’on 1913. Ella es in ün stadi chi pretenda urgiaintamaing üna sanaziun. Il fabricat da bod tschient ons ha pati malamaing da la situaziun extrema giò aint illa val. Temperaturas bassas, variaziun da temperaturas, vent ed ora, in special l’aua e l’adöver intensiv dals bogns dürant decennis han laschà lur stizis. Il squitsch da la costa vers nord, l’aua da naiv ed üna terrassa chi cuorra han accelerà ils segns da decadenza. Hoz sun dvantadas masüras d’emergenza ed üna renovaziun cumplessiva indispensablas.

Il proget da sanaziun e renovaziun da la Fundaziun NAIRS as restrendscha sün la chasa dals bogns chi’d es in seis possess. La fundaziun spera però da dar cun seis exaimpel ün impuls per cha eir tschellas parts dal monumaint architectonic unic a Nairs possan gnir preservadas da la decadenza e – scha mâ pussibel – manadas vers ün’ütilisaziun culturala. Sco stabilimaint istoric es il cumplex unic e dumonda ün’ütilisaziun extraordinaria.

Il concept da sanaziun cuntegna masüras d’emergenza per mantgnair la substanza, üna restoraziun interna cumplessiva, renovaziuns da la tecnica da gestiun e müdamaints da fabrica plü pitschens.

Prüma priorità pro la sanaziun han masüras d’emergenza per mantgnair la substanza. Quellas cumpiglian la sanaziun e stabilisaziun dal mür da sustegn nord sün tuot la lunghezza dal fabricat sco eir la drenascha da tuottas duos varts. Urgiainta es eir la sanaziun da la terrassa e dals pilasters nord in crap natüral sco eir da tuot l’entrada, dals mürs exteriurs, da las sendas e da la s-chala vest.

Translation available / Traducziun disponibel : German, English