Proget da sanaziun e renovaziun

Progettada es üna sanaziun e renovaziun generala da l’edifizi e seis adattamaint a l’adöver nouv sco halla d’art, center da cultura e chasa d’artists. Sco cha’l preproget da la cumünanza d’architects Urs Padrun e Christof Rösch muossa, es quist pussibel sainza intervenziuns gravantas illa substanza architectonica istorica.

Tuot las masüras constructivas cha’l preproget prevezza sun gnüdas planisadas tenor aspets da la chüra da monumaints ed in stretta collavuraziun cun l’uffizi correspundent. Ils müdamaints necessaris as laschan cumbinar sainza problems cun la structura existenta dal fabricat. Las transfuormaziuns previssas sun perquai fich moderadas, vegnan definidas cleramaing e rendüdas visiblas in möd discret. Ils plü importants relicts da l’istorgia industriala in connex culs bogns restan intacts e vegnan integrats i’l concept da construcziun e da gestiun. Il caracter specific dal monumaint architectonic e si’atmosfera particulara vegnan preservats tant sco pussibel.